主页 > O最生活 >【教育侏罗纪】DSE取消中文聆听和说话卷,=-=「消灭广东话 >

【教育侏罗纪】DSE取消中文聆听和说话卷,=-=「消灭广东话

【教育侏罗纪】DSE取消中文聆听和说话卷,=/=「消灭广东话

DSE话取消聆听和说话两份卷,即刻引起「消灭广东话」嘅疑虑,反应好大,可以睇到,依家个政府嘅公信力係零,你做乜嘢都冇人信,都觉得你另有大阴谋,当然呢个都係自己攞嚟。

但取消两份卷,係咪等于消灭广东话,係另一个值得探讨嘅问题。我当然係好撑广东话,爱好中文的都知道,普通话即北方话係一种退化嘅语言,声调少,剩係冇咗贴近古音嘅入声已係最大问题。之但係话分两头,一份本来係考本族语(native speaker)嘅卷,我就唔係好明有几大需要去考聆听和说话。根本新高中嘅中文课程,係当中文係second language咁考,我一直觉得好戆居。

好似去英国读书,英文科注重嘅一定係英国文学,因为有英国文学根底嘅人,修辞好,写同讲都唔会差。中文其实一样,如果真係想提升中文能力,係一定要教多啲文言文,中文好嘅人一定係有文言文根底,佢哋写嘢同演说都会较好,而唔需要额外训练聆听和说话(演说则係另一种独立于语言嘅训练,讲自信多于语文),因为那些素材都是日常生活,点解要搵份卷特登作啲有陷阱嘅题目去考学生?

大家唔好忘记,喺英殖时代,中文就只有阅读和写作两份卷,读经典文学和文言文,再加写作,已经係迈向良好中文嘅道路。而嗰阵时,广东话不单冇被消灭,而且非常强势,粤剧、粤语长片、港产片、广东歌、电视剧甚至连环图,全部都係历史高峰,并外销到全世界,也成为香港深厚嘅文化根底,是被挪用至今嘅「老本」。

好明显,冇聆听和说话卷,係唔会削弱广东语,一来其实呢两份卷係可以拣普通话答的,二来,只要你仍然坚持用广东话去生活,拒绝普通话,广东话靠佢嘅顽强生命力和深厚、源自盛世流行文化而累积嘅根底,係一定唔会被消灭。

依家最大嘅问题係︰

.好多学校由小学已拒绝广东话,普教小普教中连考聆听和说话都係用普通话,直至DSE课程才转返做广东话;
.有啲学校强迫学生一定要讲普通话;
.好多家长觉得用普通话係更好,不断鼓吹学生自小学普通话,可以的话放弃广东话,并迷信普教中等于中文好;
.好多本土歌手都转投大陆市场,唱国语歌,放弃广东歌;
.电影就变晒合拍片,放弃抵死嘅粤语对白,用普通话去写对白然后用粤语读返出嚟做配音;
.电视台不断播大陆剧,结果又係用粤语读普通话写的对白,失去粤语嘅神韵;
.服务员见到游客甚至香港人就主动用普通话(你去日本,人哋永远坚持讲日文)

以上种种行为(应该还有更多吧),先係消灭广东话嘅元兇。中文卷由DSE之前开始已有聆听和说话,但以上种种现象也同时发生,可以话,香港人放弃广东话,一向係屈服于市场多于其他因素。

(编按︰原文发表于叶一知个人脸书,承蒙作者惠允转载。)

上一篇: 下一篇: